Стојан Ѓуроски ексклузивно за „Слободен печат“: Раката ми е скршена, ќе паузирам еден и пол до два месеца
Македонскиот кошаркарски репрезентативец и член на КК Пелистер, Стојан Ѓуроски, беше повреден на скијачките терени во Маврово, во тепачка во која учествувале две групи, една од Косово, а другата од Гостивар. Четворица од косовската група биле на возраст од 14 до 30 години, а четворицата од гостиварската, на возраст од 25 до 41 година, информира МВР.
Ѓуроски одговори на телефонскиот повик на „Слободен печат“ и потврди дека бил повреден во тепачка во Маврово, не сакајќи да зборува многу за деталите од тепачката.
– Добар сум, имам скршеница на десната рака, подлактицата ми е скршена. Успешно бев опериран вчера. Следува пауза од месец и пол или два, за закрепнување. Тоа секако негативно ќе се одрази на мојата сезона. Но, ќе се трудам да се вратам што побрзо и да бидам уште поподготвен кога ќе се вратам – ни изјави Ѓуроски, кој кажа неколку збора и за инцидентот.
– Не би сакал да коментирам поопширно, меѓутоа бевме нападнати, така да кажам, од заседа. Се качувавме по ски-лифтот и тие горе не чекаа со извадени скии, подготвени – вели Ѓуроски.
Дознавме дека групата од Косово ги чекала гостиварци, подготвена за тепачка, поради инцидентот што се случил доле на почетокот на ски-лифтот.
– Не беше ништо специјално, никој не очекуваше да се случи вакво нешто – ни изјави кошаркарот кој е и репрезентативец, еден од адутите на националниот тим во квалификациите за СП 2023.
– Во моментов не знам дали повредата ќе се одрази на активностите со репрезентацијата. Тоа е крајот на февруари, се надевам дека до тогаш ќе се вратам – вели Ѓуроски, кој ни одговори на повикот од болницата „Аџибадем Систина“ каде што лежи и очекува да биде пуштен.
Неофицијално, до тепачката дошла по расправијата што се случила на почетокот на ски-лифтот, поради непочитување на редот од страна на групата од Косово.
На 02.01.2022 околу 18.15 часот, полициски службеници на СВР Тетово-Одделение за внатрешни работи Гостивар ги лишиле од слобода Ј.О.(27), Д.О.(30), Ф.О.(29) и А.О.(19) од Република Косово и Б.Д.(29),Г.Ѓ.(25), М.Ѓ.(41) и С.Ѓ.(30) од Гостивар, поради сомнение за нивна инволвираност во меѓусебна физичка пресметка, која околу 14.50 часот се случила на ски-терените на Бистра во Маврово. Според пријавеното, во физичката пресметка биле употребени и тврди предмети, а две лица, А.О. и С.Ѓ. се здобиле со тешки телесни повреди, констатирани во гостиварската Општа болница „Ферид Мурад“. Сите инволвирани се задржани во Полициската станица Гостивар за целосно расчистување и документирање на случајот, по што ќе биде поднесена соодветна пријава, информираа од МВР.