На првиот натпревар од плеј-офот за пласман во групите на Лигата на шампионите, Црвена звезда загуби минимално на гостувањето кај Макаби Хаифа со 3:2.

Израелците со овој резултат се поблиску до групната фаза, но српскиот првак во вторник (21.00 часот) пред полните трибини на стадионот „Рајко Митиќ“ во Белград ќе даде сè себе да ја анулира негативата и ги израдува своите навивачи со влез во европскиот фудбалски крем.

Потсетување дека поразениот од овој двомеч ќе игра во групната фаза на Лига Европа.

Тренерот на „црвено-белите“, Дејан Станковиќ вели дека Црвена звезда е поголем клуб од Макаби, но и дека евентуалниот неуспех во оваа пресметка нема да претставува катастрофа.

– Макаби има гол предност, на првиот меч ги покажавме нашите слабости, но во Белград ќе ги покажеме нашите добри страни. Знам само дека сме клуб за два инчи поголем од Макаби и дека местото ни е во Лигата на шампионите. Можам да бидам среќен што после 20 години играм ваков натпревар како тренер на Црвена звезда, стадионот повторно ќе биде полн. На мене е да најдам рамнотежа. Знам дека публиката го принудува тимот да напаѓа во вакви ситуации, но не смееме сите да нападнеме. Сигурно е дека нема да има опуштање, треба само да имаме баланс помеѓу нападот и одбраната – се зборовите на Станковиќ пред возвратниот дуел против Макаби Хаифа.