Средбите „Скомрахи“ се простор за креативноста, енергијата и пасијата на новите Скомраси
Факултетот за драмски уметности (ФДУ) во Скопје ги најави новите „Скомрахи 2023“, меѓународни средби на студенти од драмските академии. Од 1 до 5 ноември на сцените на ФДУ ќе бидат прикажани осум театарски претстави и 25 филмови на студенти од Романија, Србија, Полска, Хрватска, Косово, Албанија, Шпанија, Белгија, БиХ, Турција, Црна Гора, Чешка, Иран и Германија.
Пред скопската публика ќе се претстават и домаќините – студентите на ФДУ. Богатата програма вклучува и изложби, работилници, дискусии и предавања, заедно со препознатливиот „СкомрахОФФ“, музичка програма и забави во бифето на ФДУ.
– Како и во изминатите 31 година, средбите во целост се простор за креативноста, енергијата и пасијата на студентите – новите Скомраси. Како и во минатото, така и денес тие продолжуваат да размислуваат и создаваат со поглед и кон иднината, со сите нејзини предизвици. А на овогодишното издание акцентот го ставаат и на своите „улоги“ во уметноста во новото време, што се одликува со сѐ поголема „улога“ на вештачката интелигенција – посочија од ФДУ.
Отворањето на „Скомрахи 2023“ е закажано за 1-ви ноември, во Драмскиот театар – Скопје, со краткиот филм „Тага“ во режија на Тина Величковиќ и дипломската театарска претстава „Вилицата на Ибен Бајерс“, во режија на Борис Василески, и двете целосно создадени од студентите на ФДУ.
Целата програма на средбите е објавена на социјалните мрежи и веб-страницата на ФДУ, а публиката е добредојдена со бесплатен влез за сите настани.
Средбите се поддржани од ФДУ/УКИМ и Министерството за култура на С Македонија. Програмска директорка на „Скомрахи“ е Слаѓана Вујошевиќ.