Најнова балетска продукција на Националната опера и балет е современиот балет со наслов „Сага“ (Идентитети), поставена со кореографија и во режија на Рисима Рисимкин.

Претставата е поставена на музика на Тони Китановски со либрето на Матеа Мијановиќ и Рисима Рисимкин, додека костимите се на постојаниот соработник на Рисимкин, Благој Мицевски, а сценографијата е на Матеа Мијановиќ. Дизајнот на светлото го подготви Милчо Александров.

Според кореографката Рисимкин, станува збор за „Сага за седмата осмина или судбината на мигот. Клуч за времето во кое живееме. Вртлог, чувства во низа, спојување, страст, неповторливост на моментот. Луѓе. Жена. Маж. Простор. Историја. Време. Иднина. Скици и слики за нашето постоење“.

Во изведбата на балетот учествува голема балетска екипа, како и првенците, солистите и ансамблот при Балетот на НУ Национална опера и балет. Првите две изведби на балетот се одржаа на 6 и на 7 октомври на големата сцена на НОБ.

(Текстот е објавен во „Културен печат“ број 199, во печатеното издание на весникот „Слободен печат“ на 7-8.10.2023)