Солената вода ја заменија со лековита, Македонци и Руси најбројни туристи во Србија
Србија станува сè попопуларна туристичка дестинација на Балканот. Според нивната статистика, бањскиот и планинскиот туризам, но и скијачките центри во текот на зимата се само дел од дестинациите кои се посетуваат од туристите. Според бројките, забележан е значителен пораст на бројот на туристи во првите пет месеци од годинава кога се регистрирани 1.477.194 посети, што е зголемување за 16,5 отсто во однос на истиот период лани.
Најголем раст на странски гости е регистриран од Руската Федерација, Босна и Херцеговина, Северна Македонија, Турција, Хрватска, Бугарија и Црна Гора. Рекордот го држат туристите од Кина, кои се за 168,4% повеќе, за што придонесе и тоа што Кина по овогодинешниот саем за туризам во Белград, каде беше земја партнер, ја вклучи Србија на својата листа на препорачани туристички дестинации.
Србите бележат раст и кај посетите од домашни туристи без разлика на лошите економски услови. Овде има раст од 4,9 отсто, што укажува на тренд на зголемен интерес за патувања и посети на атрактивни дестинации во Србија.
– Бројот на странски туристи е зголемен за една третина или цели 33 отсто, што потврдува дека Србија успешно се враќа на меѓународната туристичка сцена. Вкупниот број на регистрирани ноќевања изнесува 4.432.841, што е зголемување за 132 отсто во однос на истиот период лани, од кои 4,3 отсто е пораст кај домашниот туризам, а 26 отсто се странци- пишуваат српските портали.
Најголем број пристигнувања на туристи е забележан во Белград – 472.289, што е пораст од 28%, а потоа следува Златибор (123.771) со раст од 68,6%. Во бањскиот туризам доминира Врњачка Бања со 66.826 пристигнувања. Во однос на бројот на ноќевања, за растот најмногу придонесоа престојот на туристите од Руската Федерација, Турција, Босна и Херцеговина, Северна Македонија и Кина – вклучувајќи го и Хонг Конг.
Со просечни три ноќевања по пристигнување, странските туристи поминуваат во просек по 2,91 ноќевања, а домашните 3,08. Кај странците најдолго престојуваат гостите од САД и Кина, а во Србија во просек поминуваат по 3,2 односно 3,81 ноќевања. Забележливо е зголемување на бројот на гости од Бугарија, Романија, Руската Федерација и Кина.