Според италијанскиот весник „Кориере“, италијанската филмска дива Софија Лорен, која на 20 септември наполни 89 години, се лизнала и паднала во бањата во својот дом во Женева.

Извор близок до весникот наведува дека Софија Лорен веднаш била пренесена во болница каде била прегледана и ѝ била дијагностицирана фрактура на бутната коска, односно неколку скршеници на колкот. Поради тешка повреда, таа морала да биде оперирана.

„Софија попладнето беше оперирана со позитивен исход, сега ја чека рехабилитација“, објавија нејзините претставници.

Покрај неа се нејзините два сина Едоардо и Карло.

Имено, пред повредата, а потоа и до операцијата, италијанската дива се подготвувала за пат и отворање на четвртиот ресторан кој го носи нејзиното име во Италија.

Актерката требаше да замине во Бари, каде што ја очекуваа на 26 септември на инаугурацијата на објект што ќе го носи нејзиното име. Очигледно нема да може да присуствува, но настанот, сепак, ќе се одржи, пренесуваат локалните медиуми. Лорен ќе оди во Бари, веднаш штом ќе закрепне и секако, откако ќе ѝ биде дозволено да патува со авион.