Словенечката компанија ќе започне со менаџирање на сметот во Тетово од 1 јануари, уверуваат општинските власти
Градоначалникот на Општина Тетово Билал Касами уверува дека од 1 јануари словенечката компанија ќе започне со менаџирање на сметот во Тетово.
Според него веќе е започната процедурата за преземање на вработените, а на утрешната седница на Советот ќе се промени и статутот на ЈКП Тетово.
„Треба да се земат некои дозволи од Министерството за животна средина и од 1 јануари ќе започне официјално да започне да работи словенечката компанија. Со тоа вработените ќе ги земаат редовно платите. Најпрвин треба да се стабилизира претпријатието, па потоа ќе ги исплатиме заостанатите плати. Можеби една плата општината ќе плати, а другата заостаната плата ќе ја плати можеби словенечката компанија, рече градоначалникот на Општина Тетово Билал Касами.
Инаку по штрајкот кој вработените на Јавното комунално претпријатие Тетово го одржаа минатиот месец, а на кој побараа да има се исплатат заостанатите плати, општината одлучи да им пушти на сметка само една плата.
Но, се уште како што велат тетовските комуналци не им се исплатени платите за три месеци. Поради ваквите доцнења на платите со години, тие се без здравствено осигурување, а претежно се работи за болни и постари луѓи кои работаат на минусни температури и во многу лоши услови.
