Што прави денеска: Маја Кикириткова, модна дизајнерка
Етаблираната дизајнерка Маја Кикириткова е едно од најзвучните имиња на нашата модна сцена. Со години активно и посветено твори, успешно навигирајќи помеѓу работата, професијата и родителството.
Познатата дизајнерка и инфлуенсерка е мајка на две прекрасни деца, Ева и Лазар, кои ги има со својот сопруг Александар. Маја многупати отворено зборувала за мајчинството, за целата убавина што ја носи, но и за сите стравови и тешкотии низ кои поминала со безрезервната поддршка од нејзиниот сопруг.
Како изгледа еден ден на Маја Кикириткова?
„Денот ми започнува во 6.30, кога се будиме со децата, ги подготвувам за во градинка, а потоа доаѓам дома и го пијам утринското кафе сама, го правам планот за тековниот ден и започнувам со работа.
Ги везам куклите од „Совршен Пар“, па потоа ги пакувам и ги праќам до моите клиенти. Во меѓувреме, завршувам и некои тековни обврски, околу 13-14 часот правам ручек, ги земам децата од градинка и тогаш следи раздвижувањето низ дома.
Лазар и Ева се активни деца и сакаат постојана занимација, па од земањето од градинка до легнување, денот го поминуваме заедно.
Можеби некоја прошетка, дружба со пријатели, одење на англиски, или едноставно дома, каде што сите четворица играме и се забавуваме.
Децата ги легнувам во периодот од 21 до 22-22.30, а додека легнам и јас, времето го поминувам за себе и сопругот.
Речиси секој ден е ист, со исклучок на викендите, кога одиме некаде, правиме пикник или едноставно се дружиме со пријатели“.