Германскиот канцелар Олаф Шолц во понеделникот ги увери кинеските студенти во Шангај дека не мора да пушат канабис доколку студираат во Германија и дека Германија го легализирала канабисот надевајќи се дека потрошувачката ќе се намали.

Шолц ги даде коментарите како одговор на прашање на студент од Универзитетот Тонги, кој праша дали ќе мора да пуши канабис ако студира во Германија, бидејќи дрогата не е легална во Кина, пренесува Ројтерс.

Германија донесе закон за легализирање на канабисот во февруари, дозволувајќи им на поединци и здруженија да одгледуваат и да поседуваат ограничени количини канабис.

„Ние не сакаме повеќе луѓе да консумираат канабис, сакаме помалку луѓе да консумираат канабис, сакаме да има поголема јавна едукација за тоа. Одговорот е многу едноставен: не пуши. Оваа година ќе имам 66 години и никогаш не сум пушел канабис“, рече Шолц.

Канцеларот, кој е во посета на Кина и ќе се сретне со лидерите во Пекинг во вторник, рече дека Германија сака да го извади канабисот „од сивата зона“.

Околу 4 милиони луѓе конзумирале канабис во Германија во 2022 година, според податоците на Министерството за здравство.