Како издание број 81 на дискографската куќа „Шарла рекордс“, објавен е албум со музика за театарската претстава „Чудна случка со кучето во ноќта“. Композитор на музиката е Давид Ангелевски.

Станува збор за албум составен од авторска музика, оригинално компонирана и снимена за потребите на истоимената претстава во режија на Зоја Бузалковска, според романот на Марк Хадон и адаптацијата на Сајмон Стивенс. Претставата е на редовниот репертоар на Драмски театар Скопје.

– Фантастична и крајно луцидна приказна на односи преку толку специфичниот свет на Кристофер Бун. А во тој свет не постојат лаги, нема концепт за толеранција на неискреноста. Постои само вистина. И затоа е тој свет толку посебен и нежен.

Да се пишува музика за една ваква претстава значи да се нурне длабоко во светот на Кристофер Бун, да се разберат сите негови постапки и реакции, понекогаш многу неочекувани, секогаш потполно искрени. Прашањето што се поставува е како звучи неговата перцепција на светот што го опкружува, неговото доживување на луѓето и на појавите?

Овде музиката станува неговиот внатрешен глас, неговите мисли и емоции, неговата паника од хаосот околу него и неговото спокојство во точките на познатото, неговите гласни стравови и тивки победи, неговата посебност.

Освен тоа, музиката треба да го следи и филмскиот јазик на раскажување на приказната, како и брзите „паркур“ динамични промени на времето и просторот – напиша режисерката Зоја Бузалковска по повод објавата на музиката за претставата.

(Текстот е објавен во „Културен печат“ број 158, во печатеното издание на весникот „Слободен печат“ на 10-11 декември 2022)