Откако во медиумите излегоа информациите дека севернокорејскиот лидер Ким Џонг Ун се наоѓа во тешка здравствена состојба по операција на срце, од Кремељ порачаа дека сепак ќе почекаат официјални информации за неговата здравствена состојба.

– Ги проследивме информациите во медиумите. Не знаеме во која мера се веродостојни. Чекаме официјални информации за неговата здравствена состојба, изјави Дмитриј Песков, портпарол на Кремељ.

Лидерот на Северна Кореа, на изненадување на јавноста, ја пропушти прославата за роденденот на својот дедо на 15. април, што пак предизвика гласини за неговата здравствена состојба.

Јужнокорејската влада наведува дека не се забележани невообичаени активности во Северна Кореа по непотврдениот извештај според кој Ким Џонг Ун е во критична состојба.

Во руската Дума сметаат дека непојавувањето на Ким на прославата може да се објасни и дека тоа е поради превентивни мерки со цел негова заштита од корона вирусот.