Сањол не стравува од „црвено-жолтите“: Грузија оди на победа и против Македонија
Репрезентацијата на Грузија во голем стил ги започна настапите во Лигата на нации, во првите два натпревари оствари две победи над Гибралтар и над Бугарија, и на 9 јуни во Скопје и гостуваат на Македонија во дерби пресметката од групата 4 во дивизијата Ц.
Грузијците импресионираа со вчерашната убедлива победа од 2:5 во Разград против Бугарија и пред дерби пресметката со Македонија се лидери на табелата со максимални шест бодови, додека „црвено-жолтите“ имаат четири бода и се втори на табелата.
Селекторот на Грузија, Вили Сањол најави дека неговите фудбалери и во Скопје ќе играат на победа.
– Ова е одличен резултат за нас. Тоа ни ја зголемува самодовербата пред наредните натпревари. Ефикасноста беше на завидно ниво, одигравме еден квалитетен меч, но сега тоа мораме да го заборавиме и да се фокисираме на следниот предизвик. Би сакал и таму да победиме, тоа би била веќе голема позитивна серија. Но, прво да се одмориме и добро да се подготвиме – рече Вили Сањол.