САД денеска ветија дека ќе ги охрабрат другите арапски земји да го признаат Израел, на министерскиот состанок организиран по повод годишнината од историските договори за нормализација, склучени под покровителство на поранешниот американски претседател Доналд Трамп, пренесува Ројтерс.  

„Ќе ги поттикнеме и другите земји да ги следат патиштата на Емиратите, Бахреин и Мароко“, рече американскиот државен секретар Ентони Блинкен на виртуелна средба со колегите од Израел, Обединетите Арапски Емирати и Мароко.  

“Сакаме да го прошириме кругот на мирна дипломатија. Во интерес на земјите од регионот и светот е да се третира Израел како и сите други земји”, инсистираше тој.  

„Нормализацијата ќе донесе поголема стабилност“, рече тој, додавајќи дека „договорите на Абрахам“ се корисни за населението во регионот.  

На 15-ти септември 2020 година, Обединетите Арапски Емирати и Бахреин станаа првите земји од Заливот што ги нормализираа односите со Израел. Мароко и Судан ги следеа.  

По доаѓањето на власт, демократот Џо Бајден, кој сака да ја прекине ерата на Трамп, рече дека ги одобрува тие договори, кои се сметаат за еден од најголемите дипломатски успеси на неговиот републикански претходник.