Ристовски: Разочарани сме, но Грузија беше подобра и мора да ѝ се честита
Селекцијата на Македонија го доживеа првиот пораз во Лигата на нации, во Скопје загуби од Грузија со 3:0, а фудбалерот кој е задолжен за давање голови Милан Ристовски вели дека сите фудбалерите се разочарани, но не се откажуваат од битката за првото место во групата.
По три кола во групата 4, Грузија има максимални девет бода, додека Македонија е втора со четири бодови.
– Со оглед на тоа колку се подготвувавме и верувавме во овој натпревар, разочарани сме. Но, понекогаш фудбалот е таков, да не речам суров. Не секогаш испаѓа така како што ќе замислите. Грузија беше подобра и мора да ѝ се честита. За жал, мора да се надеваме сега и да правиме математики. Не сакавме да се доведеме во таква ситуација, но, за жал ќе мора да чекаме на кикс на противникот и ние да победиме на гости ако сакаме да конкурираме за првото место – рече Ристовски.
Јунскиот циклус во Лигата на нации, Македонија ќе го заврши в недела (18 ч.) кога во Скопје ќе игра против Гибралтар кој пак вечерва приреди изненадување играјќи 1:1 против Бугарија.