Националната галерија во објектот Чифте амам на 13 октомври го претстави ретроспективниот опус на академскиот сликар Павле Кузманоски. Сликарот Павле Кузманоски досега имал 53 самостојни и учествувал на повеќе од 250 групни ликовни изложби во земјава и во странство.

Во најавата на ретроспективната изложба на Павле Кузманоски е запишано дека „вистинската уметност не е ирационална. Таа е реална, јасна, конкретна, нема лага, кокетирање и манипулирање. Да се занимаваш со уметност, значи да се чувствуваш слободен, да бидеш дете и тогаш кога веќе не си, а пак, да се занимаваш со уметност целиот свој живот, значи да ги ставиш емоциите на отворен простор, да зборуваш од срцето, да ја отвориш душата, заради што публиката ќе те награди и, што е поважно, ќе те запамети“.

Ретроспективната изложба на Павле Кузманоски содржи стотина експонати, портрети на истакнати и знаменити личности, цртежи, мртви природи, акварели, познатите Менади, сведоци, Апокалипсата. Неговите сведоци се полни со тежок судбински фатализам. Ликови што сведочат, но и опоменуваат, порачуваат и потсетуваат на егзистенцијалната ситуација. Верба на уметникот е дека естетското освојување на светот е единствената можност вистински да се хуманизира денешнава цивилизација. Тоа е пораката што ни ја упатува Кузманоски со изложбата во Чифте амам.

Куратор на проектот е Љупчо Маленков, виш кустос во Националната галерија на РСМ. За публиката, изложбата ќе биде достапна до 23 октомври 2020 година.

(Текстот е објавен во „Културен печат“ број 52, во печатеното издание на „Слободен печат“ на 10-12 октомври 2020)