Ако го сакате тестото во сите облици, тогаш овој рецепт ќе ве воодушеви!

Едноставен е и сите состојки сигурно веќе ги имате во кујната, а невозможно е да му одолеете, па ве советуваме да си направите дупла мера.

Станува збор за малите грчки крофни што се нарекуваат лукумадес, во прашање се мали топчиња од тесто.
Крофните лукумадес треба да бидат крцкави и шупливи, а традиционално се служат со сируп од мед и посипани со цимет.

Состојки:
За крофни:

– 1 шолја (240 милилитри) млака вода
– ½ шолја млако бадемово млеко (може да искористите и обично, кравјо млеко)
– 2 шолји бело брашно
– 1 ќесичка сув квасец
– прстофат сол;
– 1 лажица масло за јадење + масло за пржење

За сервирање:

Шеќер, мед, цимет, јаткасти плодови (сечкани или мелени), шеќер во прав…

Подготовка:

Измешајте ги сите суви состојки, вклучувајќи го и квасецот. Потоа, додадете ја млаката вода и млекото и добро промешајте ги состојките додека не добиете течна смеса налик на тесто за палачинки.

Покријте го тестото со фолија и оставете еден до два часа да отстои, додека тестото не се крене и не добие многу меурчиња по површината.

Кога тестото ќе биде готово, сипете масло во подлабок сад и загрејте го. Кога маслото добро ќе се загрее, во него ставајте по една лажичка од смесата.

Пржете по околу четири крофнички одеднаш и тоа на умерена температура. Крофничките ќе испливаат на површината, па повремено вртете ги за да се испржат рамномерно.
Кога ќе попримат златно-кафеава боја, вадете ги од маслото и редете ги на хартија за да се впие вишокот маснотија.

Крофничките прелијте ги со мед, цимет и мелени јаткасти плодови или пак посипете ги со шеќер во прав, ако сакате поедноставни вкусови.