Движењето Зелен хуман град денеска организираше мирен протест пред зградата на Јавното обвинителство во Скопје, повторно изразувајќи револт поради проектот за изградба на висококатници на паркингот спроти хотелот „Холидеј Ин”.

Од Зелен хуман град велат дека проектот планиран во центарот на Скопје е нелегален и оти станува збор за корупција во надлежните органи.

-Од мај годинава досега тие немаат никакво известување за јавноста односно никаков напредок во предметот. Ако сакаме да спречиме корупција, ако сакаме да спречиме злоупотреба и оштетување на граѓаните во оваа земја, едноставно не може органите на државата да постапуваат на овој начин и да ги штитат инвеститорите. Не смеат да го штитат крупниот капитал, а да работат на штета на скопјани. Оваа власт наводно се бореше против Скопје 2014, но изгледа за да може да ни го сервира Скопје 202, рече Драгана Велковска од Зелен хуман град.

„Актуелната централна власт тврдеше дека е против градењето и против проектот Скопје 2014, но со нив добивме Скопје 2021”, додаде Велковска.

„Ако се изградат тие згради, центарот на Скопје ќе стане најгусто населен простор во светот”, рекоа учесниците на денешниот протест.