Продолжува судењето за пожарот во тетовската модуларна болница, ќе бидат сослушани нови сведоци
Во Основниот суд во Тетово денеска во 11 часот ќе продолжи судскиот процес за пожарот во модуларната болница, а ќе бидат сослушани нови сведоци кои се повикани на барање на адвокатите на обвинетите.
Минатато рочиште на 21 март сослушани беа универзитетските професори кои во предистражната постапка изработиле вешт наод и мислење во писмена форма, како и две медицински сестри, ангажирани во модуларната болница.
Обвинетите, директорите Фљорин Бесими и Артан Етеми, докторот Бобан Вучевски и претставник на Клиничка болница Тетово како правно лице на почетокот на судењето истакнаа дека го разбираат обвинението, но не признаваат вина и дека не ги сториле делата за кои се товарат.
Судењето за пожарот што се случи на 8 септември 2021 година, кога животите ги загубија 14 луѓе, а десетина беа повредени почна на 7 декември 2022 година откако од септември 2022 до тогаш судскиот процес беше неколку пати одложуван.