Македонскиот ФИБА делегат Петар Денковски ќе го контролира мечот за трофејот, Галатасарај (Турција) – Асвел (Франција) кој ќе се игра во Истанбул. Денковски добива уште едно големо признание во својата сега веќе делегатска интернационална кариера.

Имено еден од нашите официјални лица со беџот на светската кошаркарска организација-ФИБА, ја доби честа, односно улога на ФИБА-инструктор на финалниот натпревар од Еврокупот во женска конкуренција.

Дуелот кој ќе се игра на 12 април ќе одлучи која од двете екипи финалисти, домаќинот Галатасарај и Асвел од Вилербан ќе го освои пехарот во ова европско клупско натпреварување.

Ова е и највисоката официјална номинација од ФИБА за еден наш официјален претставник во европските клупски натпреварувања не само во оваа сезона. А во исто време и едно големо признание и за македонската кошаркарска федерација.

Инаку Денковски, како ФИБА-инструктор, ќе ја контролира работата на официјалните лица на оваа средба, односно судиите Паоло Маркес (Португалија), Гизела Гиорги (Норвешка) и Бенџамино Мануел Атард (Италија).