Преживеан патник од возот во Грција: Хорор, огнот беше насекаде, вистински хаос
Најмалку 32 лица загинаа, а 85 се повредени при судар на возови во близина на грчкиот град Лариса околу полноќ, соопштија пожарникарите. Во централна Грција се судрија патнички и товарен воз, а спасувачките екипи ги извлекуваат патниците од згмечените вагони. Еден од преживеаните ги раскажа ужасните искуства.
„Слушнавме голема експлозија“, рекол патникот Стерјос Миненис, а пренесува агенцијата Ројтерс.
„Беа десет секунди ужас. Се превртувавме во вагонот додека не паднавме на страна и метежот престана. Потоа настана паника. Огнот беше насекаде… Десет или петнаесет секунди беше хаос. Превртување, пожари, закачени кабли, скршени прозорци, луѓе што врескаат, луѓе заробени“, рече тој.
Властите соопштија дека евакуацијата е сѐ уште во тек.
„Евакуацијата на патниците е во тек во многу тешки услови со оглед на сериозноста на судирот на возот“, изјави портпаролот на противпожарната служба Василис Вартакојанис.
Регионалниот гувернер на Тесалија Константинос Агорастос за „ТВ СКАИ“ изјави дека првите четири вагони од патничкиот воз излетале од шините во судирот, додека првите два вагони, кои се запалиле, биле „речиси целосно уништени“.
Гувернерот рече дека два воза се движеле еден кон друг по истата пруга. „Тие патуваа со голема брзина и еден возач не знаеше дека другиот доаѓа“, рече тој.
„Тоа беше многу моќна несреќа. Ова е страшна ноќ… Тешко е да се опише сцената”, рече тој.