На сцената на Театар „Јордан Хаџи Константинов – Џинот“ во Велес, во рамките на редовниот репертоар, на 21 декември, во 20 часот, ќе биде изведена претставата „Драма изгубена во времето“ на текст на Сашко Насев и во режија на Деан Дамјановски.

Во претставата играат Талија Настова во ликот на Таа, актерка на зрели години, и Самоил Стојановски како Тој, искусен актер. Сценографијата за претставата ја дизајнираше Филип Коруновски, видеодизајнот и фотографијата се на Данчо Стефков, аудиодизајнот е на Сашко Костов, а дизајнот на светло е на Марјан Тодоровски. Премиерата на претставата се одржа на 10 ноември 2023 во Велешкиот театар.

„Драма изгубена во времето“ е едно од последните драмски дела на Насев, работена според мотиви од расказот „Темносино, речиси црно“ на грчкиот писател Танасис Валтимос, но и според мотиви од други домашни и странски дела. Оваа драма претставува колаж од теми кои се концентрирани околу единствените два лика – ликот на Таа и Тој, двајца актери кои во текот на дејството се навраќаат на своите професионални и приватни животи. Во оваа игра на реминисценции се бришат границите меѓу реалноста и сценскиот живот и читателот често не знае дали ликовите се играат себеси или играат други ликови.

Насев тоа го многу умешно го прави преку нијансираните и зачудни ликови, неочекуваните пресврти, вештиот дијалог, како и преку употребата на средства од медиумот на филмот. Крајниот резултат е една современа драма во која театарската сцена е претставена како место на кое се преплетуваат различни перспективи и стварности, актери и нивните ликови и каде се слави животот во целата негова комплексност и убавина.

Претставата „Драма изгубена во времето“ тргнува токму од таа „колажност“ на темите во текстот и ја развива во еден недефиниран простор кој може да биде театарска сцена, работната соба на писателот, неговата глава… Темите во претставата, организирани како во своевиден лавиринт, се преплетуваат околу прашањата – Што е стварноста, а што театарот? Каде завршува едното, а почнува другото? Колку е стварна стварноста?

– Ваквата структура на лавиринт, кој има само влезови, но не и излез, која само поставува прашања, но не дава одговори, е изградена со средствата на актерската игра, театарскиот, како и филмскиот медиум. Комбинирани заедно тие создаваат напната атмосфера на чекање – чекање да дознаеме нешто, чекање да заврши претставата, драмата, животот… – истакнува режисерот Деан Дамјановски.

Претставата „Драма изгубена во времето“ зборува за релативноста на односот помеѓу стварноста, паметењето и означувањето – помеѓу слученото, запишаното и одиграното. Таа зборува за невозможноста да се достигне Вистината и да се запознае Стварноста, што, од една страна е поразително сознание, но, од друга, толку многу инспиративно.

Сашко Насев е еден од најплодните македонски драмски автори. Меѓу неговите најпознати дела се вбројуваат драмите „Грев или шприцер“, „Чија си“, „Женски оркестар“ (1 и 2), „Доле влада“, „Магдо, љубов моја“, кои се преведени на повеќе јазици и кои се играни над стотина пати на сцените во Македонија и надвор од неа.

Насев е автор на неколку филмски сценарија, меѓу кои и на сценариото за филмот „Самоуништување“ со незаборавниот лик „Чичко Кумплунг“. Автор е и на сценаријата за ТВ сериите „Бумбари“ и сега актуелната „Црвениот поет“. Сашко Насев е професор на Факултетот за драмски уметности на катедрата за Драматургија и филмско сценарио.