Во една од четири здравствени установи во светот нема редовен пристап до чиста вода. Како резултат на тоа, околу 1,8 милијарди луѓе се изложени на зголемен ризик од зараза со ковид-19 и други инфекции, се вели во извештајот на Светската здравствена организација (СЗО) и Фондот за деца на ОН (УНИЦЕФ).

– Околу 1,8 милијарди луѓе се изложени на зголемен ризик од заразување со ковид-19 и други болести, бидејќи користат или работат во здравствени установи што немаат основни услуги за вода. Водата, канализацијата и хигиената се од витално значење за безбедноста на здравствените работници и на пациентите, но не секогаш на тие услуги им се дава приоритет, се вели во извештајот.

Најтешка е состојбата во 47-те најмалку развиени земји во светот.

СЗО и УНИЦЕФ се залагаат за поголеми инвестиции во вода, во санитарни услови и во хигиена, нагласувајќи дека тие услуги се особено важни за ранливото население, особено бремените жени и децата.

Авторите на извештајот проценуваат дека решавањето на проблемот со водата во болниците и здравствените центри во најмалку развиените земји бара инвестиција од само еден долар по глава на жител во тие земји.