Пратениците денеска ја продолжуваат расправата за законот за решавање на спорот на Владата со Макпетрол
Собранието денеска треба да ја продолжи расправата по Предлог законот за решавање на спорот меѓу Владата на Република Северна Македонија и „Макпетрол АД Скопје“ по пат на спогодба по скратена постапка.
Ова законско решение предвидува да му се признае сопственост на „Макпетрол“ на 50 отсто од гасоводот во земјата и да му се исплати цена од 33 милиони евра.
Во текот на расправата во петокот, пратениците од опозицијата со говори, реплики и контрареплики се обидуваа да го спречат донесувањето на овој закон. Тие сметаат дека предложеното законско решение е едно од серијата закони што ја убиваат правдата и ги прекршуваат основните начела на правото.
Според нив, не може да има закон за спор зашто тој се решава со медијација и во судовите. Не смее, нагласија, Собранието да прерасне во квази суд, бидејќи тоа е надлежно само за ратификации на договори. Повикувањето на акти од минатото од 1987 година што може да се искористат како искуство, е недозволиво, посочија пратениците од опозицијата, а институциите не треба да се затскриваат зад законот, туку да го решат спорот на начин каде и како што треба. Тие очекуваат претседателот да се одважи и да стави вето, ако овој закон, сепак, биде изгласан.
Во расправата, министерот за економија Крешник Бектеши реплицираше дека треба да се прави разлика меѓу номиналната и актуелната вредност на секое АД и додаде дека во 2006 година кога била основано АД ГА-МА, номиналната вредност била 1.500 денари за акција, а сега во моментот е 12.500 денари.
– Само гасоводот Клековце – Штип, долг 61 километар, чини 71 милион евра. Со изградбата на гасоводот како држава ќе добиеме поевтин енергенс и ќе се намали загадувањето на животната средина, а индустријата ќе стане поконкурентна на глобално ниво, рече Бектеши.
Пратениците од власта во дискусиите истакнаа дека проценката за вредноста на гасоводот е направена по сите стандарди од една домашна и една странска институција и е на 300 страници и оти покрај гасоводот во неа се ставени и други материјални добра и машини со што вкупната вредност е 33 милиони евра.
