По обвиненијата за сексуално вознемирување: Лизо нема да настапи на „Супербол“ следната година
Името на американската раперка Лизо веќе не е меѓу оние кои, можеби, ќе ја забавуваат многубројната публика за време на полувремето на „Супербол“ следната година, дознава „Дејли мејл“.
Причината за оваа одлука на организаторите на „Супербол“ се, секако, неодамнешните тврдења од страна на поранешни танчарки на Лизо, кои ја обвинија американската раперка за „сексуално вознемирување и создавање непријателско работно окружување“.
„Преговорите со Лизо, за таа да настапи на полувремето на ‘Супербол’ или да ја изведе националната химна, се ‘мртви’ откако таа се најде среде овој сканал“, изјави извор од Националната фудбалска лига (НФЛ) во САД.
На почетокот од овој месец, Лизо се најде среде голем скандал, кога нејзините поранешни танчарки Кристал Вилијамс, Ноем Родригез и Аријана Дејвис поднесоа тужба против неа. Тие тврдат дека Лизо, меѓу другото, извршила притисок врз една од нив да допира и да танцува со гол изведувач во клуб во Амстердам.
Исто така, во тужбата се наведува дека Лизо, која е позната по тоа што се залага за прифаќање на различностите кога станува збор за физичкиот изглед, ја искритикувала Дејвис за нејзината телесна тежина.
Добро упатени извори тврдат дека менаџерскиот тим на Лизо прави сѐ за да ја спаси кариерата на раперката.
„Тоа станува сѐ потешко, бидејќи сѐ повеќе луѓе ја обвинуваат за екстремно несоодветни дејствија“, вели извор за „Дејли мејл“.
Танчарки ја тужат Лизо за сексуално вознемирување, едната од нив ја нарекла „дебела“