Одбојкарите неодамна со победата против Грузија обезбедија пласман на уште едно Европско првенство, четврто во низа, а сите наши пласмани дојдоа во период кога Петар Јовановски е предводник на федерацијата .

Првиот човек на ОФМ, со голема гордост зборува за овој подвиг, но и потенцира дека вистинските предизвици допрва следуваат.

„Главната и основна цел да се задржи континуитетот на настапи на Европските првенства е исполнета. Горд сум на овие момци, на оваа генерација која несебично се дава и се бори за одбојката да го достигне ова ниво на кое сме во моментов. Имавме напорно, долго и топло лето, во кое се она што беше поставено како амбиција е исполнета. Настапот во Европската Златна лига Македонија го заврши со најдобар резултат досега и обезбеди опстанок во ‘златното’ друштво и следната година. Од викендов потврдено е и учеството на четвртото ЕП во низа – презадоволен сум. Федерацијата и Управниот одбор направија се за репрезентацијата да има беспрекорни услови за работа, а довербата е оправдана на најдобар можен начин. Ова е успех на одбојкарите, на стручниот штаб и селекторот Јошко Миленкоски, а потоа и на Управниот одбор, канцеларијата на ОФМ и секој кој на било каков начин помогна во комплетниот процес. Секако, не смееме да ја заборавиме публиката! Без нејзината поддршка и инспирацијата која ја дава од трибините овој успех немаше да биде комплетен. Министерството за спорт ги препознава нашите резултати и ни дава дополнителен ‘ветер во грб’. Пресреќен сум и презадоволен. Емоциите се уште силни“, вели Јовановски.

Со пласманот на Европското првенство не завршува работата, напротив, следи еден од најважните процеси: подмладување на репрезентацијата. Селекцијата ќе влезе во нов циклус со свежа крв, а ЕвроВолеј 2026 ќе биде прв сериозен тест за новата генерација.

„Уште сме под импресии на успехот, но од друга страна свесни сме дека ќе мора многу брзо да се консолидираме и да се фатиме за работа, затоа што тешкото допрва доаѓа. Имаме промена на генерација во репрезентацијата, а патот за младите е веќе трасиран. Европското првенство ќе биде првиот сериозен тест за нив, на кое ќе треба да се покажат и да го продолжат она што оваа генерација го создаде. Имаме потенцијал и верувам во светла иднина, која е во рацете на младите. Ние како Федерација ќе направиме сè за да добијат најдобри можни услови за подготовка за ЕП, а потоа сè е на нив. Имаме малку време за оддишка, ќе ги почекаме противниците во октомври, а потоа со сите сили кон ЕвроВолеј“, заклучи претседателот на ОФМ.

ВИДЕО: Одбојкарите по пласманот на Европското првенство заиграа и оро