Нема опасност од дестабилизација на државата, но  можно е драстично демократско уназадување и економско стагнирање ако уставните измени во Сообранието не се изгласаат до ноември, изјави Претседателот на државата  Стево Пендаровски, во интервју за емисијата „Трилинг“ на Телевизија 24.

-Не можам да кажам дека нема да бидат, не ги знам евентуалните комуникации, ако постојат, кои луѓе од Владата или меѓународни посредници можеби ги имаат со двете страни. Можеби тука нешто ќе се промени. Но, гледам дека позицијата на опозицијата е прилично тврда, а искуството ме учи дека кога се приближуваме кон избори, а изборите се за седум до десет месеци од денес, многу тешко го менувате тој став кој ви носи партиски поени. Овој став на главната опозициска партија е од чисто партиски резон, за да добијат гласови, особено кај етничките Македонци, рече Пендаровски.

Смета дека „не е никаков проблем, ниту опасно  за стабилноста, перспективите и иднината на Македонија Бугарите да бидат една од 12-13 заедници кои ги имаме или ќе ги имаме во Уставот“.

-Ако 3 500 луѓе што живеат во Македонија се проблем, тогаш не знам што друго би било реален проблем што би ни се заканувал, рече Пендаровски.