Одеса остана без струја по новиот руски напад
Украинското пристаниште Одеса утрово остана без струја, откако руски воздушен напад оштети еден од високонапонските објекти таму, соопшти водечкиот украински енергетски провајдер ДТЕК, пренесува Ројтерс.
„Ситуацијата останува тешка“, објави ДТЕК на Телеграм. „За да се намали оптоварувањето на мрежата, денеска во градот нема да работи електричен транспорт, а ограничена е и индустриската потрошувачка“.
Администрацијата на Одеса на Телеграм соопшти дека градот и регионот биле нападнати од неколку дронови лансирани од Русија. Четири дронови биле соборени над Одеса и соседните региони на Миколаев.
Остатоците од падот на беспилотно летало предизвикале пожар во електроенергетскиот објект, кој бил навремено изгаснат, додаде управата.
Украинската војска соопшти дека противвоздушната одбрана уништила 8 од 9 беспилотни летала лансирани од Русија во текот на ноќта. Повеќето од беспилотните летала се уништени во регионите Одеса и Миколаев.