По стартниот пораз од Финска, македонските одбојкарки загубија и од Словенија со 3:0 по сетови 25:13, 25:20 и 25:14 во второто коло на Европското првенство за одбојкарки до 19 години кое се одржува во нашата земја.

Првите четири поени во СЦ „Борис Трајковски“ беа за Словенија, потоа фативме ритам, се доближивме на 10:9, но противничките направија серија и убедливо го добија првиот сет. Во вториот влеговме со 4:4, стигнавме на 10:10, се заканивме на нагатива од 18:16, но Словенија се одлепи кога најмногу требаше.

Во третиот сет имавме водство од 4:1 кое траеше кратко, а противникот повторно доминираше и на крајот ги освои бодовите.

Мери Бошковска со девет поени беше најефикасна во нашата селекција, по три запишаа Добрина Хаџи Тосева, Мила Долдурова, Анастасија Овнарска и Ива Стојкоска, како и Ана Јаничиќ, која влезе во третиот сет.

Словенечките одбојкарки имаа 12 активни блока, 10 повеќе од нас, имаа два аса плус и подобар прием, така што впечатокот е на ниво како на отворањето против Финска. Во понеделник во рамките од групата „1“ на ЕП ќе играме против Грција, која денеска загуби од Финска во пет сета.

На табелата во групата „1“ води Италија со шест бодови, пред Финска која има пет, по три Словенија и Полска, претпоследна е Грција (еден), а без бодови е Македонија. Во групата „2“ по првите две кола водат Србија и Холандија со по шест бодови, по три Турција и Хрватска, а ниту еден Романија и Швајцарија.