Договор за соработка меѓу Владата на Македонија и Владата на Албанија за развој на инфраструктурни проекти, логистичка безбедност и ефикасност на транспортот на стоки меѓу двете земји потпиша денеска во Тирана првиот вицепремиер Артан Груби. Според него, овој проект ги надминува димензиите на национален проект и е од стратешко значење за развојот на Западен Балкан, а со него се предвидува изградба на  автопат со 6 ленти од Скопје до Ќафасан, со што растојанието помеѓу Скопје и Тирана ќе се намали на 2,5 часа, а меѓу Скопје и Валона на 3 часа.

„Да поедноставиме, градиме автопат со 6 ленти од Скопје до Ќафасан, со што растојанието помеѓу Скопје и Тирана ќе се намали на 2,5 часа, Скопје и Валона на 3 часа. За максимално искористување на пристапот до пристаништето, планираме да ја започнеме и железничката врска Скопје – Кичево – Поградец – Драч. Во јануари ги спојуваме двете гранични контроли во една, со цел конечно да ги отстраниме границите меѓу нас. Ја градиме и интерконективната енергетска врска меѓу нас со два проекта, трафостаница во Охрид и високонапонска врска Битола-Елбасан”, рече Груби.

Според него, бројни се скептиците кои не веруваат во реализација на проектите што се започнати за да се отстранат границите, бројни се и ќе бидат оние кои ќе се обидат да направат опструкции, да ја потценат нивната тежина, но додаде, „наша должност е да продолжиме со работа размислувајќи за идните генерации и за она што можеме да им го оставиме денес како наследство и основа за здрава иднина”.