Обвинителката Ленче Ристоска го доби случајот против Советот на јавни обвинители, откако поднесе претставка до Комисијата за спречување и заштита од дискриминација.

Како што соопшти Ристоска, Советот на обвинители и нејзиниот претседател Антонио Јолевски имаат рок од 30 дена јавно да ѝ се извинат на обвинителката Ристоска за тежок облик на дискриминација кон неа.

– Комисијата за спречување и заштита од дискриминација ја уважи мојата претставка и утврди директна продолжена дискриминација како потежок вид на дискриминација по основ на лично својство и општествен статус извршена од страна на Советот на јавни обвинители. Во време кога е модерно да се декларираат заложби за етичко лидерство во институциите и култура на професионален и личен интегритет, како и родова и секој друг вид на рамноправност, декларативноста треба да се замени со практична и јавна поддршка на поединците што ги поседуваат овие квалитети и ги водат овие битки, објави Ристовска на нејзиниот Фејсбук профил.

Воведувањето на мерит систем, наспроти практикување на дискрециски овластувања, како што наведува таа во Фејсбук статусот, ќе влијае на зголемување квалитетот на работата и консеквентно на довербата во јавнообвинителскиот систем, бидејќи е едно од најсилните оружја против корупција, клиентелизам и дискриминација.

Ристоска која беше обвинителка во СЈО, поднесе пријава против Советот на јавни обвинители со тврдење дека неправедно и без никаков основ ги игнорирало нејзините апликации за избор во Вишото јавно обвинителство.