Нови проблеми за Ѓоковиќ, задолжителна вакцинација за настап на Ролан Гарос
Првиот тенисер на АТП ранг-листата, Новак Ѓоковиќ, лесно може да се случи да не настапи на ниту еден гран слем турнир годинава доколку не се вакцинира против коронавирус, бидејќи и на Ролан Гарос ќе биде задолителна вакцинацијата.
Француските власти донесоа одлука сите професионални спортисти, домашни и странски да бидат вакцинирани доколку сакаат да учествуваат на спортските настани во оваа земја, а тоа го вклучува и вториот годинешен гран слем турнир, Ролан Гарос кој ќе започне на 22 мај.
Пред неколку дена, организаторот на Ролан Гарос најави дека ќе овозможи учество на невакцинирани против ковид-19 тенисери и тенисерки кои би биле сместени во „меур“, но таа одлука експресно беше сменета. Одлуката ја соопшти француската министерка за спорт, Роксана Марсинену.
„Ќе работиме заедно за зачувување на конкуренција и ќе бидеме амбасадори на овие мерки на меѓународен план“, напиша Марсинену на Твитер.
Le pass vaccinal a été adopté. Dès que la loi sera promulguée, il deviendra obligatoire pour entrer dans les ERP déjà soumis au pass sanitaire (stade, théâtre ou salon) pour l’ensemble des spectateurs, des pratiquants, des professionnels français ou étrangers 1/2
— Roxana Maracineanu (@RoxaMaracineanu) January 16, 2022
Претседателот на Тениската федерација на Франција, Жил Моретон истакна дека нема да биде можно да се настапи на Ролан Гарос со медицинско изземање, што значи дека единствен услов за настап е тенисерите и тенисерките да бидат вакцинирани против ковид-19.
По ваквата одлука на француските власти, останува неизвесно дали Новак Ѓоковиќ ќе настапи на некој од четирите гран слем турнири годинава, бидејќи и организаторите на Вимблдон и УС Опен, најавија дека ќе ги следат упатствата на нивните влади кои се залагаат само вакцинирани тенисери да учествуваат на турнирите.
Новак Ѓоковиќ бидејќи не е вакциниран, не ја брани титулата на Австралија Опен кој започна утринава. Сојузниот суд ја потврди одлуката на министерот за имиграција, Алекс Хок, да му биде укината австралиската виза која ја доби со медицинско изземање.
