Поднесена е нова пријава за сексуален напад против францускиот актер Жерар Депардје, соопшто адвокатката Карин Дирије Дибол.

Правната застапничка, која веќе ја брани актерката Шарлот Арно, наводната жртва на силување која покрена обвинение против Депардје во декември 2020 година, во петокот поднесе нова тужба против актерот до париското обвинителство за дела како што се сексуален напад, сексуално вознемирување и сексистички навреди, пренесува „Монд“.

Според неа, споменатите дела датираат од 2021 година и не се застарени, а се случиле за време на снимањето на филмот „Зелените ролетни“ („Les Volets verts“), во режија на Жан Бекер.

Жената која ја поднела жалбата, по име Амели (53), била продукциска дизајнерка на сетот.

Во изјава за порталот „Медиапар“, таа наведе дека актерот ѝ упатил бројни груби коментари на сетот во Париз на 10 септември 2021 година, а потоа „брутално ја грабнал“ и „ја стегнал околу струкот и стомакот, а потоа и нејзините гради“.

Пријавениот напад, наводно, бил спречен од телохранителите на актерот.

Истражниот сајт, исто така, тврди дека актерката Аноук Гринбер, која го осуди однесувањето на актерот кон жените во печатот, поднела тужба за клевета против Беатрис Гајсман, адвокатката на Депардје.

Претходно, во 2023 година, 13 жени го обвинија актерот за сексуален напад или вознемирување, според новинарската истрага на францускиот „Медиапар“.