Македонската ракометна репрезентација до 19 години забележа нов пораз на Европското првенство во Романија. Исланд денес беше подобар од нас со 35:29 во разигрувањето за последните четири места.

Исланѓанките од самиот старт ја наметнаа својата игра и брзо си создадоа предност од 5:1, Македонија во продолжение успеа да се врати, дури и поведовме на двапати со 6:7 и 7:8. Но, се покажа дека тоа ќе бидат единствените моменти во кои имавме предност.

Исланд набрзо повторно ја наметна својата игра и на пауза замина со пет голови предност (20:15). Во второто полувреме избраничките на Јулијана Дамчевска се обидуваа да се вратат во игра, но немавме сили и на крајот загубивме со 35:29.

Анастасија Трпеска беше најефикасната кај нас со шест гола, по пет постигнаа Стефаноска и Јанкуловска, а по четири Дукоска и Коцева.

Македонија за избегнување на последното место ќе игра против Србија или Хрватска, во зависност која репрезентација ќе загуби во нивниот меѓусебен дуел.