Министерството за здравство го заврши надзорот за бебето што почина во Битола, ама нема јавно да каже што содржи извештајот. Изговорот е дека Јавното обвинителство има отворено предистражна постапка и затоа извештајот од стручниот надзор спроведен во болницата ќе им биде испратен само на обвинителите. Дури и мајката Викторија Крстеска нема да го добие извештајот од констатираната состојба за нејзиното породување, а од Министерството за здравство велат дека се обврзани само да го испратат до Обвинителството.

Крстеска, чие бебе почина при породувањето, е децидна дека тоа е резултат на лекарска неажурност и лош третман. Таа сѐ уште го нема добиено ниту отпусното писмо од болницата, за што завчера реагираше на Фејсбук.

-Ете јас после 12 дена се уште немам отпусно писмо. Се уште мојата историја ја нема. Као технички си испишана, а документ од мене нема??? Никаде? И нема мучканици? Или народски речено, “Чекај да се погодиме на смена заедно, напрајвме шо напрајвме, дај шо да напишиме да се извајме, да налепиме друг или да напрајме се да е подмачкано?”, напиша Крстеска на својот Фејсбук профил за трагичниот ден кога при породувањето почина нејзиното бебе Јован.

Таа е решена да ја истера правдата до крај.

„Ни го убивте бебето поради вашето его, надменост и непрофесионализам. Мислејќи дека сте Бог. Убијци. Парична казна? Смешно е. Дури не сносат одговорност нема да се откажеме“, порача таа.

Крстеска обвинува за лекарска негрижа и лошо изведено породување поради кое го загуби своето бебе.