Судот во Пекинг денеска започна со сослушувањата на семејствата на кинеските патници кои бараат отштета за членовите на семејството исчезнати на летот МХ370 на Малезија ерлајнс во Индискиот Океан пред речиси една деценија. Повеќе од 150 кинески државјани биле на летот од Куала Лумпур до Пекинг на 8 март 2014 година. Во авионот имало 227 патници и 12 членови на екипажот.

Малезиските истражители не ја исклучуваат можноста авионот намерно да излетал од курсот, а она што се верува дека се негови остатоци се појавиле на бреговите на Африка и на островите во Индискиот Океан. Роднините на исчезнатите сега бараат компензација од Малезија ерлајнс, производителот на авиони Боинг, производителот на мотори Ролс-Ројс и осигурителната компанија Алијанц, меѓу другите.

Судот не објави детали за правната постапка, но државните медиуми објавија дека секој од над 40-те членови на семејствата бараат од 10 до 80 милиони јуани, што е помеѓу 1,4 и 11,2 милиони долари. Носејќи написи на кои пишува „продолжете со потрагата“ и „вратете го меѓународниот истражен тим“, портпаролот на семејството Џианг Хуи рече дека „Малезија ерлајнс“ не им оставила избор и дека единствената опција им била да одат на суд.

„Нивниот став е „ние веќе не сме одговорни“, рече Џијанг, чија мајка била на летот. Голем број полицајци беа надвор од судницата во округот Чаојанг во Пекинг пред почетокот на судењето, а беше поставен кордон меѓу новинарите и членовите на семејството.

Дел од семејството подоцна разговараше со новинарите, велејќи дека сакале да ја продолжат потрагата по исчезнатиот авион и директна комуникација од авиокомпанијата со нив, како и психолошко советување. Друга група членови на семејствата ја повикаа малезиската влада во март да и дозволи на американската компанија „Оушн Инфинити“ да започне нова истрага за летот.