Израелскиот премиер Бенјамин Нетанјаху денеска изјави дека обновувањето на иранското збогатување на ураниум од 20 проценти има за цел развој на нуклеарно оружје и дека Израел никогаш нема да дозволи Техеран да го произведува.

Нетанјаху во соопштение наведува дека иранската одлука за збогатување може да се објасни само како обид за продолжување на спроведувањето на намерата за развој на воената нуклеарна програма.

Нетанјаху додава дека Израел нема да дозволи Иран да произведува нуклеарно оружје.

– Иран го обнови збогатувањето на ураниум од 20 проценти во подземниот нуклеарен комплекс Фордо – изјави претходно владиниот портпарол Али Рабеи за агенцијата Мер.

Иран почна збогатување на ураниум до 20 проценти

Тоа е спротивно на Договорот постигнат во 2015 година од кој се повлекоа САД и Иран и најверојатно, како што пренесуваат странските агенции, ќе наштети на плановите на новоизбраниот американски претседател Џо Бајден за Вашингтон повторно да ги почитува преземените обврски од Меѓународниот договор за иранската нуклеарна програма.

На 1 јануари Меѓународната агенција за атомска енергија (МААЕ) соопшти дека била информирана дека Иран планира повторно да збогатува ураниум до 20 проценти во Фордо.