Необичен, но вкусен рецепт на Стефанија Несторовска: Кускус песто оброк салата
Ако барате урамнотежена, хранлива, вкусна и лесна идеја за оброк, Стефанија Несторовска, која стои зад инстаграм-профилот и блогот snestorovska.com, денеска ни приготви рецепт за здрав нутритивен оброк.
Многу лесно може да се адаптираат состојките, а Стефанија како инспирација споделува една нејзина верзија.
Кускусот е познат како „најмалата тестенина во светот“, a процесот на подготовка на оваа салата не може да биде поедноставен. Она што е важно е дека кускусот е здрава намирница.
Состојки:
– 2 филџани варен кускус*
– 1 филџан варен грашок (или грашок од конзерва)
– 1 краставица, исечкана на мали коцки
– половина филџан фета-сирење (јас користев веганско, но користете какво сакате)
– половина филџан ситно исечкан магдонос
– 1/4 филџан ситно исечкано нане
– 1 филџан песто
* јас користев безглутенски кускус од леќа и наут, но слободно може да користите каков имате или, пак, да замените со киноа/хелда или некоја друга житарка. Варете според инструкциите на пакувањето.
Подготовка:
Додајте ги сите состојки во голем длабок сад и убаво промешајте сè додека сите состојки не се изедначат.
Пробајте и тестирајте, па ако има потреба дополнително додадете сол, бибер и слични зачини. Јас немав потреба, сосема ми беше зачинето од пестото.
Со оглед на тоа што нема лиснати зеленчуци, оваа салата може да стои во фрижидер и до 3-4 дена што ја прави совршена за консумирање, но и за подготовка на оброк. Може да ја користите како прилог на некое парче месо или риба или како целосен оброк.