Немирите продолжуваат: Палестински тинејџер со автомобил удрил во воен пункт, Израелците го убиле
Израелските сили убиле палестински тинејџер кој со автомобил удрил во воен контролен пункт на окупираниот Западен Брег, при што тешко ранил израелски чувар, соопшти израелското Министерство за одбрана, пренесува Еј-Би-Си њуз.
Инцидентот се случил на контролен пункт меѓу Израел и централниот Западен Брег, во близина на градот Тулкарем. Повредениот израелски чувар се наоѓа на лекување во медицинскиот центар Шеба во Тел Авив и се очекува да преживее, се наведува во соопштението на Министерството за одбрана.
Во соопштението се додава дека наводниот палестински напаѓач имал 16 години.
Насилството тлее на Западниот Брег, дел од територијата окупирана од Израел за време на војната на Блискиот Исток во 1967 година и која Палестинците ја бараат за идната држава, откако мировните преговори под покровителство на САД беа прекинати во 2014 година.