Во италијанската фудбалска Серија А екипата на Рома одигра нерешено 2:2 против Верона, а на тој меч тренерот на римскиот клуб, Жозе Мурињо доби црвен картон.

Португалскиот стратег беше незадоволен од судењето на Лука Паирето и од лутина ја шутна топката кон трибините.

После тоа беше исклучен од главниот арбитар поради една реченица која ја кажа Мурињо и поради која ризикува да биде жестоко казнет.

– Намерно те пратија, Јувентус те испрати – беа зборовите на Мурињо, а пренесува италијанскиот дневен весник „Ла Стампа“.

После тоа првите луѓе на Рома им се извинуваа на судиите поради однесувањето на Португалецот. Според најавите од Италија можно е Мурињо да биде суспендиран на два или три натпревари.

Јуве оваа сезона не е толку доминантен како во изминатите години, моментно „Старата дама“ се наоѓа на четвртото место со 47 бодови, зад Милан (56), Интер (54) и Наполи (53), а „волчицата“ е на осмата позиција со 41 бод.