„Не сакам екстремни мерки, но можеби треба да одиме таму – да наметнеме вето за да се отрезнат овие политичари. Не го исклучувам тоа“, изјави поранешниот претседател на Бугарскиот парламент и професор по право, Огњан Герџиков, за бугарската телевизија „Нова“.

Причина за ова, како што објасни Герџиков, е „ескалацијата на тензиите против Бугарите“ во земјава.

„Бугарија не можеше на светот да му ја покаже состојбата на односите и историската вистина со Република Македонија, додека тоа го правеа Македонците. Работите се длабоко вкоренети долго време. Во Македонија се разви посебен шовинизам, антибугарски чувства. Ова е многу деликатна тема, тука е потребен многу дипломатски пристап. Губат повеќе, со оваа конфронтација им се пресекува или барем се одложува патот кон ЕУ. Зошто да отстапиме од имињата на бугарските културни клубови – Ванчо Михаилов и цар Борис Трети?“, праша Герџиков.

Според него, постои опасност следниот парламент да го повтори она што се случи досега.

„Се надевам дека ова е последна ротација – парламенти за неколку месеци. За жал, не можам да бидам сигурен. Кризата е во немањето дијалог, бидејќи партиската себичност преовладува над националните интереси“, вели Герџиков.