Затворениот руски опозициски лидер Алексеј Навални ги обвини американските технолошки компании „Епл“ и „Гугл“ за таен договор со рускиот претседател Владимир Путин, бидејќи, на барање на руските власти, тие ја повлекоа неговата апликација наменета за гласање на изборите во Русија.

„Ако нешто ме изненади за време на изборите, не беше толку Путин, кој ги фалсификуваше резултатите, туку ме изненадија семоќните големи технолошки компании кои послушно станаа негови соучесници“, напиша Навални на социјалната мрежа Инстаграм.

 

„Едно е кога монополистите на мрежата држат стап, со цврсти принципи за животот, кои ја сакаат слободата. Но, сосема е поинаку кога овие луѓе се и кукавици и алчни “, додаде тој.

Навални напиша дека овие луѓе на големите екрани велат дека сакаат да го направат светот подобро место, но внатре има само „лажговци и лицемери“, експлицитно посочувајќи ги Гугл, Епл и Инстаграм.

Под притисок на Москва, Гугл и Епл минатиот петок се согласија да ја повлечат од своите он лајн продавници во Русија апликацијата за избори која ја постави тимот на Алексеј Навални

Апликацијата овозможуваше да се добијат упатства како и кога да се гласа за да се поразат кандидатите за Кремљ на парламентарните избори, одржани од 17 до 19 септември.

Гугл блокираше и две видеа на Ју Туб, во сопственост на технолошката компанија, каде што поддржувачите на руската опозиција ги објаснија упатствата.

Системот за пораки Телеграм, многу популарен во Русија, исто така, ги повлече упатствата на 18 септември на барање на рускиот регулатор за телекомуникации.

Според извори контактирани од агенцијата Франс прес, властите се заканија дека ќе ги уапсат вработените во тие технолошки компании во Русија.

Руската опозиција посочи на масовни малверзации на изборите, на кои владејачката партија освои двотретинско мнозинство во парламентот.