Минатата година банкарскиот сектор ја завршил со кредитен раст од 8,3 проценти, додека растот на депозитите бил 7,5 проценти, што е повеќе од она што го проектирала Народната банка.

„На годишна основа, кредитниот раст на крајот на четвртиот квартал изнесуваше 8,3%, што е над проектираниот годишен раст според октомвриската проекција од 7,1%. Овие движења се поддржани и од солиден раст на депозитната основа, како главен извор на финансирање на банкарскиот систем. Имено, годишниот раст на вкупните депозити на крајот на декември достигна 7,5%, што е над растот проектиран во октомвриската проекција од 7,1%“, пишува во најновиот извештај на Народната банка.

Во извештајот, Народната банка се осврнува и на инфлацијата каде како позитивен момент го оценува сегашното поумерено движење на базичната инфлација, но сепак, потенцираат дека и понатаму има ризик од раст на цените.

– Во четвртиот квартал од 2021 година, се забележува забрзување на инфлацијата како резултат на движењата кај прехранбената и енергетската компонента и привремените несовпаѓања на понудата и побарувачката, предизвикани од пандемијата. Согласно со тековната динамика на закрепнување на домашната економија и на пазарот на работна сила, засега не се согледуваат позначителни притисоци од побарувачката врз ценовниот раст. На ова упатуваат и движењата кај базичната инфлација, којашто за разлика од општото ценовно ниво, бележи малку поумерена динамика од очекуваната. Воедно, домашната инфлација е во согласност и со ценовните придвижувања забележани во еврозоната. Сепак, имајќи ја предвид неизвесноста и променливоста на факторите коишто делуваат на ценовното ниво, постојат нагорни ризици за инфлацијата – велат од Народната банка.