Ковакс механизмот на Светската здравствена организација (СЗО) е главната глобална шема за вакцинирање против ковид-19 на луѓето во земјите со ниски и со средни примања ширум светот и има за цел до крајот на 2021 година да достави најмалку две милијарди дози на вакцини, покривајќи 20 проценти од најранливите земји, главно во Африка, во Азија и во Латинска Америка.

Британските медиуми наведуваат дека поборниците на планот тврдат дека програмата се соочува со недостаток на средства, ризик за снабдување и сложени договори, што може да го оневозможат остварувањето на нејзините цели.

Во интерниот извештај на управниот одбор на компанијата „Гави“, која заедно со СЗО ја води програмата Ковакс, се наведува дека ваквиот неуспех може луѓето во сиромашните земји да ги остави без пристап до вакцини против ковид-19 до 2024 година.

Во извештајот уште се наведува дека „ризикот од неуспех е голем бидејќи шемата е поставена многу брзо и на неистражена територија”.