Со претставување на романот „Ронлива“ и разговор со авторката Милена Сиљаноска, 9. „Поетска епизода“ и концерт на „Кенопсија“, младинското здружение за култура „Култура Бета“ ќе го прослави својот 4. роденден.

Настанот ќе се одржи на 16 февруари и ќе почне во 18.30 во кафе-книжарницата „Буква“. Во првиот дел од настанот, во 18.30 часот, ќе има претставување на романот „Ронлива“, во 20 часот почува 9. „Поетска епизода“, а во 22 часот ќе започне концертот на „Кенопсија“. Во текот на целата вечер во „Буква“ ќе биде поставен и штанд на младинската креативна платформа „Спознавање“, каде што ќе може да се купат нивните списанија.

Романот „Ронлива“ е дебитантски роман на младата авторка, поетеса и писателка Милена Сиљаноска. „Ронлива“ е поетски роман, роман за книжевноста, испреплетен со многу музика и со многу љубов. Во рамки на преставувањето на „Ронлива“ ќе може да се проследи разговор со авторката Милена Сиљаноска придружен со осврт за романот, а потоа авторката ќе потпишува примероци од него. Настанот ќе го модерира Андреј Медиќ Лазаревски.

Деветтото издание на „Поетска епизода“ е посветено на ангажираната поезија под мотото „Нешто е гнило (во државата Данска?)“. На ова поетско читање ќе настапат седум поетеси и поети: Виолета Танчева-Златева, Љубица Петровска, Ива Петреска, Благица Трајкоска, Ангела Бошкоска и младите поети Андреј Медиќ Лазаревски и Марија Велинова, кои и ќе го модерираат настанот.

„Кенопсија“ е новиот проект на младиот музичар Виктор Стојчевски, чиј прв албум излезе минатата година. По промоцијата на романот во октомври во кафе-книжарницата „Буква“, а во соработка со „Култура Бета“, овојпат „Кенопсија“ гостуваат со акустична свирка во дуо-формат со Виктор Стојчевски и Мартин Џорлев.

„Спознавање“ е младинска креативна платформа од Битола која досега има издадено три броја од своето списание „Спознавање“, главно фокусирана на музика. Меѓу кориците може да се најдат интервјуа со локални музичари и бендови – во најновиот број се објавени разговорите со „Funk Shui“, КЕМ, „Паркети“, „Жива“, Свемирко и „Искра“; како и разговори со независната театарска група „Артопија“, музичката продукција „Пасворд“ и младиот фотограф Никола Јовановиќ. Во рамки на списанието може да се прочитаат и неколку колумни, како и претставување на неколку локални уметници.

Со овој настан „Култура Бета“ ја прославува својата работа изминативе четири години и отвора уште една, нова, петта година во која здружението планира уште повеќе настани, соработки со локалната и младинска културна сцена, креирање содржини, објавување свои изданија и поткасти.