Овогодинашната победничката на натпреварот за Мис Јапонија, Каролина Шино (26), која по потекло е од Украина, се откажа од титулата откако таблоид откри инфoрмации за нејзината афера со оженет маж, пишува „Би-би-си“.

Каролина беше крунисана за Мис Јапонија пред две недели, а нејзината победа предизвика јавна дебата поради нејзиното потекло и за тоа кои се вистинските традиционални јапонски идеали за убавина. Додека некои го поздравија крунисувањето на натурализираната Јапонка, други рекоа дека таа не ги претставува традиционалните јапонски идеали за убавина.

Контроверзноста со младата победничка ескалираше, откако локално списание објави наводи за нејзината врска со оженет лекар и инфлуенсер.

Организаторите на натпреварот првично застанаа во нејзина одбрана и рекоа дека Каролина не знаела дека човекот е оженет. Подоцна, потврдија дека таа ја продолжила врската дури и откако дознала за брачниот статус на лекарот.

Каролина се извини што ја довела јавноста до заблуда. Организаторите на Мис Јапонија соопштија дека го прифатиле нејзиното барање да се откаже од титулата и длабоко се извинија на спонзорите, судиите и другите засегнати страни. По нејзината одлука за повлекување, титулата Мис Јапонија ќе остане празна до крајот на годината.

„Навистина ми е жал за огромните проблеми што ги предизвикав и за предавството на оние кои ме поддржуваа“, рече таа.

Инаку, на 22 јануари Каролина беше крунисана за Мис Јапонија, како прва личност со европско потекло. Таа е родена во Украина, а на пет години се преселила со нејзината мајка во Јапонија, кога го добила јапонското презиме на нејзиниот очув. Каролина зборува и пишува течно јапонски, а во 2022 година стана натурализирана јапонска државјанка.

ФОТО | Воена пилотка стана Мис Америка: „Жените можат да постигнат сѐ!“