Филип Миркуловски вечерва го одигра последниот натпревар во дресот на македонската репрезентација и од националниот дрес се прости на најдобар начин, со победа над Чешка од 27:25 што значи пласман на Светското првенство во Полска и Шведска.

– Првичната цел е остварена, се пласиравме на СП. Сепак, овој натпревар беше посебен мотив за мене бидејќи ми беше последен во дресот на македонската репрезентација. Отсекогаш беше посебно да се игра за националниот дрес, секогаш сум го давал максимумот без разлика како сум одиграл, дали добро или не, но секогаш сум давал се од себе на теренот – изјави Миркуловски по победата над Чешка.

Миркуловски кој останува во репрезентацијата како асистент на Кирил Лазаров, смета дека Македонија има светла иднина.

– Кога ја започнав кариерата беше тешко бидејќи игравме претквалификации и квалификациите, но сега овие момци имаат настапи на ЕП и СП. Ние постатирите им оставивме добро наследство, да играат на ЕП и СП, а не како јас, Кире, Столе и останатите да играме во претквалификации и квалификации. Мислам дека имаме добра иднина, имаме ракометари како Митев и Атанасијевиќ кои ќе имаат голема кариера. Дај боже да ме надминат мене и да имаат големи успеси во репрезентацијата и на клупски план – вели Миркуловски.