Мини-фестивалот „Светско, а наше – Саботи на светска музика“ ќе се одржи во „Паблик рум“ во Скопје
Концерт на неофолк бендот „Калата“ на 17 февруари (сабота) ќе го отвори мини-фестивалот „Светско, а наше – Саботи на светска музика“ во „Паблик рум (Јавна соба)“ во Скопје. Со овој проект „Паблик рум“ секоја сабота ќе даде посебен акцент, во форма на мини-фестивал, на најдоброто од нашата држава во жанрот – светска музика.
„Калата“ е неофолк бенд од Скопје, кој прави паралела помеѓу источната и западната култура, со акцент на традиционалната македонска музика. Без ограничувања, музичарите се потпираат на своите чувства и инспирација, и со тоа се слободни да го свират она што ќе го побара нивната имагинација.
Групата „Калата“ од 2018 година настапува низ целата земја, вклучително и на „Д-Фестивал“, ПИН – Музичка конференција и шоукејс, како и на некои европски фестивали кои се дел од мрежата „MOST Music Programme“. Нивниот прв албум „Калата“ ќе биде објавен на почетокот на 2024 година, а дел од овој материјал ќе биде претставен и пред публиката на 17 февруари.
Членови на „Калата“ се Минела Богдановиќ – вокал; Марија Илиевска – придружен вокал; Симеон Ангеловски – бас; Александар Бошков – гитара; Кирил Кузманов – саксофон; Дамјан Грујо – тапани.
„Паблик рум“ веќе ги најави и следните домашни музички артисти што се дел од овој проект – уникатната Зарина Првасевда со својот бенд, како и веќе добро познатите „Фолтин“ од Битола.
Поради ограничениот број публика, билети за овие интимни музички сеанси можат да се купат само онлајн на drugastrana.mk.
Фестивалот „Светско, а наше – Саботи на светска музика“ е во организација на „Паблик рум (Јавна соба)“ од Скопје.
(Текстот е објавен во „Културен печат“ број 218, во печатеното издание на весникот „Слободен печат“ на 17-18.02.2024)