Михајловиќ: Постојаното зголемување на општинската администрација ја храни само корупцијата
Пренатрупаната и нефункционална администрација од претходното раководство се одразува на квалитетот на услугите што ги добиваат граѓаните. Во општинската администрација има ангажирано над 350 лица со договор за дело и 340 лица кои се во редовен работен однос.
Вработен во општина Тетово со години земал плата од општината, a самиот живеел во Германија, изјави тетовскиот градоначалник Билал Касами.
Катица Михајловиќ од Асоцијацијата за демократски иницијативи (АДИ), граѓанска организација, која работи на промоција на демократијата, доброто владеење и следење на општествените процеси смета дека зголемувањето на општинската администрацијата само ја храни корупцијата.
– Со постојаното зголемување на администрацијата всушност ние само ја храниме корупцијата. Ситната корупција (мито, непотизам, итн.) за време на процесот на пристап до јавните услуги е меѓу најчестите форми на корупција со кои директно се среќаваат граѓаните и која речиси целосно зависи од човечкиот фактор во тој процес. Побројната администрација, значи поголем бирократски товар врз граѓаните. Наместо да ги дигитализираме процесите, ние упорно тапкаме во место и гледаме само како да се задоволат партиските апетити. Партиите остануваат најголемиот работодавец, а селективноста при вработувањето ја прилагодуваат на својата потреба да останат на власт. Оттука, стандардот за професионална, политички неутрална, високо етички созреана и сервисно ориентирана јавна администрација со капацитет да се стави во функција на остварување на правата и должностите на граѓанинот, сѐ уште е недостижен, изјави Михајловиќ за „Слободен печат“.