Македонски ПЕН центар: Прегледот за 2020 година е објавен на англиски јазик
Годишниот преглед на македонскиот ПЕН центар за 2020 година е објавен како издание на англиски јазик. Меѓу содржините на прегледот се застапени омажи, поезија, проза, есеи и осврти на македонски поети, писатели и книжевни критичари. Бројот ги принесува омажите за Славко Јаневски (1920-2000), Илхами Емин (1931-2020) и Данило Коцевски (1947-2020).
На страниците за поезија се застапени поетите Ристо Лазаров, Весна Ацевска, Зоран Анчевски, Бранко Цветкоски, Иван Џепароски, Никола Маџиров и Владимир Мартиновски, додека од прозните автори се застапени Александар Прокопиев, Томислав Османли, Милчо Манчевски, Оливера Ќорвезироска и Калина Малеска.
Во есеистичко-критичкиот сегмент на англиски јазик се објавени текстови од Анастасија Ѓурчинова, Елизабета Шелева, Никола Маџиров, Наташа Аврамовска, Санде Стојчевски, Ацо Пероски и Лидија Капушевска-Дракулевска.
Главен и одговорен уредник на периодичното списание на македонскиот ПЕН Центар е Зоран Анчевски, додека уредник на бројот за 2020 година е Владимир Мартиновски.
(Текстот е објавен во „Културен печат“ број 65, во печатеното издание на „Слободен печат“ на 23-24 јануари 2021)