Македонија има европски вицешампион во таеквондо
Дејан Георгиевски е вицешампион на Европа, тој освои сребро на Европското сениорско првенство во олимписко таеквондо „Сараево 2020“, Босна и Херцеговина.
Во големото финале за златниот медал македонскиот натпреварувач загуби тесно со резултат 18:19 против претставникот на Србија, инаку Иранец, Махди Кобадакши, поранешен светски шампион.
Иако во последната трета рунда Георгиевски влезе во водство со 15:7, противникот на крајот успеа да дојде до триумфот.
– Тежок ден, четири фулконтактни борби една по друга со класни борци, но ништо не е тешко кога мотивот е Македонија! Ова сребро е со златен сјај, во финалето постојано водев скоро до самиот крај, но спортот знае да е остар и да ни дава нова мотивација.
Благодарам на подршката која доаѓа од сите страни, благодарам на клубските другари, на сите новинари, на моето семејство на моите тренери особено на Д-р Борче Костовски, на сите вас а особено на моите тренери им ветувам дека одиме на медал од олимписки игри! За Македонија, до крај – се зборовите на Георгиевски.
Претходно Македонецот на овој турнир славеше победи над Андреј Гарбар (Украина) со 11:4, потоа над Босанецот Динко Шегедин (12:7) и Шпанецот Рос Даниел (11:4).
– Ова е историски медал за македонскиот олимписки спорт и секако за македонското олимписко таеквондо, овој медал се вбројува во неколкумина медали на официјални Европски првенства освоени во олимписки спортови од како Македонија е независна држава. Да потсетиме Дејан Георгиевски 2017 година беше европски сениорски шампион со пет победи на само 18 годишна воздраст – известуваат од Македонската Таеквондо федерација.